एनएमबी बैंकको एफपिओको बिक्री खुल्यो, कति कित्ता र कहाँबाट आवेदन दिने?

एनएमबी बैंकले आज जेठ ३० गतेदेखि थप सार्वजनिक निष्काशन (एफपिओ) को बिक्री खुला गरेको छ । एफपीओको निश्कासन तथा बिक्री प्रबन्धकको काम नागरिक लगानीकोषले गर्नेछ । बैंकले एक करोड १४ लाख १५ हजार १६३ कित्ता एफपिओ बिक्रीमा ल्याएको हो । बैंकले एक सय रुपैयाँ अंकित मूल्यमा २३३ रुपैयाँ प्रिमियम थपेर प्रतिकित्ता ३३३ रुपैयाँमा एफपीओ बिक्री गर्न लागेको हो । हाल एननएमबीको दोस्रो बजारमा प्रतिकित्ता ३६७ रुपैयाँमा कारोबार भईरहेको छ ।

बैंकको एफपिओमा जेठ ३० गतेदेखि असार ३ गतेसम्म आवेदन दिन सकिनेछ । उक्त अवधिमा आवश्यक आवेदन नपरेमा असार २८ गतेसम्म आवेदन गर्न सकिनेछ ।  इच्छुक लगानीकर्ताहरुले न्यूनतम १० कित्ता र अधिकतम ५७ हजार ७० कित्तासम्म धितोपत्र बोर्डबाट स्वीकृत प्राप्त गरेका सम्पूर्ण सि–आस्वा सदस्य बैंक तथा वित्तीय संस्था र तिनका शाखा कार्यालयबाट आवेदन दिन पाइनेछ । साथै मेरो शेयर प्रयोकर्ताले भने घरमै बसेर इन्टरनेटको माध्यमबाट आवेदन दिन सक्नेछन् ।एनएमबी बैंकले संस्थापकको ५१ र सर्बसाधारणको ४९ प्रतिशत हिस्सेदारी कायम गर्न एफपिओ बिक्री गर्न लागेको हो । एफपिओबाट बैंकले २ अर्ब ६५ करोड रुपैयाँ प्रिमियम संकलन गर्नेछ भने एक अर्ब १४ करोड १५ लाख रुपैयाँ चुक्ता पूँजी थपिनेछ । हाल बैंकको चुक्ता पूँजी ६ अर्ब ४६ करोड १७ लाख रुपैयाँ रहेको छ । एफपिओ जारी पश्चात बैंकको चुक्ता पूँजी ७ अर्ब ६० करोड ३२ लाख नाघ्नेछ । राष्ट्र बैंकले तोकेको न्यूनतम चुक्ता पूँजी कायम गर्न बैंकले थप ४० करोड रुपैयाँ पूँजी विस्तार गर्नेछ ।

यस्तो छ वित्तीय अवस्था

बैंक अफ दि इयर-२०१७' लगायतका केही अन्तर्राष्ट्रिय उपाधि पाएर वर्षभरि चर्चामा रहेको एनएमबी बैंक संचालनमा रहेका वाणिज्य बैंकहरुमध्ये मध्यमस्तरको बैंकको हो । बैंकमा नेदरल्याण्डको एफएमओ विदेशी साझेदारका रुपमा रहेको छ । जसको प्रगति उत्साहजनक नै छ । गतबर्ष एक अर्ब १५ करोड खुद नाफा कमाएको बैंकले चालु आर्थिक बर्षको तेस्रो त्रैमास अर्थात चैत्रसम्म एक अर्ब ४१ करोड खुद नाफा कमाएको छ । ६ अर्ब ४६ करोड १७ लाख रुपैयाँ चुक्तापूँजी भएको बैंकको जगेडा कोषमा पाँच अर्ब ६३ करोड छ । एफपिओ बिक्री पश्चात दुई अर्ब ६५ करोड प्रिमियम संकलन हुनसक्छ । जसले उसको जगेडाकोष अझै मजबुत बन्नेछ । गत चैत्रसम्म बैंकले ८५ अर्ब २९ करोड निक्षेप संकलन गरेर ७४ अर्ब १ करोड कर्जा परिचालन गरेको छ । उसको कर्जा पूँजी निक्षेप अनुपात ७५.३३ प्रतिशत, निस्क्रिय कर्जा अनुपात १.१० प्रतिशत, पूँजी कोष १२.९३ प्रतिशत छ । बैंकको प्रति शेयर आम्दानी २९ रुपैयाँ रहेको छ भने प्रतिशेयर नेटवर्थ १८५ रुपैयाँ, ईक्विटीमा प्रतिफलको अनुपात १७ प्रतिशत छ । मूल्य आम्दानी अनुपात १५.२९ गुणा बढी छ ।