विश्वकपमा रुसको शानदार सुरुवात, आज ३ वटा खेल हुँदै

विश्वकप फुटबलको उद्घाटन खेलमा आयोजक राष्ट्र रुसले शानदार सुरुवात गरेको छ । बिहीबार भएको खेलमा रुसले साउदी अरबलाई ५–० गोल अन्तरले हराएको हो ।नेपाली समय अनुसार बिहीबार राति पौने ९ बजे सुरु भएको खेलमा रसियालाई जिताउन डेनिस चेरसेबले २ तथा युरी ग्याजिन्स्की, आर्तेन जुबा र अलेक्जेण्डर गोलोविनले १/१ गोल गरे । रसियाले खेलको १२ औं मिनेटमा नै ग्याजिन्स्कीको गोलमा अग्रता लियो । त्यसपछि चेरसेबले ४३ औं मिनेटमा गोल थपेपछि पहिलो हाफमा रसियाले २- ० को अग्रता लियो ।  ७१ औ मिनेटमा जुबाले गोल गरे भने बाँकी २ गोल खेलको इन्जुरी समयमा भयो । इन्जरी समयको पहिलो मिनेटमा नै चेरसेबले गोल गरे भने खेल सकिने केही सेकेण्ड अगाडि गोलोविनले गोल गरे ।

 आज शुक्रबार पनि ३ खेल हुँदैछन् । समूह ‘ए’ मा साँझ ५:४५ बजे इजिप्ट र युरुग्वे प्रतिस्पर्धा गर्दैछन् । यसैगरी, समूह ‘बी’ को पनि २ वटा खेल हुँदैछन् । मोरक्को र इरानको खेल ८:४५ बजे हुनेछ भने राती ११:४५ बजे स्पेन र पोर्चुगल भिड्नेछन् ।