एनआइसी एशिया बैंकले १.८३ अर्बको ऋणपत्र ल्याउँदै, वार्षिक ब्याज ११ प्रतिशत दिने

एनआइसी एशिया बैंकले वार्षिक ११ प्रतिशत ब्याज पाउने गरी १ अर्ब ८३ करोडको ऋणपत्र निश्काशन गर्ने भएको छ । यसअघि ९ प्रतिशत वार्षिक ब्याज पाइने गरी ३ अर्बको ऋणपत्र बैंकले निश्काशन गरेको थियो । बैंकले रु.१,००० अंकित दरका १८,३०,००० कित्ताले हुन आउने रु.१ अर्ब ८३ करोड रुपैयाँ बराबरको “११% एनआइसी एशिया ऋणपत्र २०८२/८३” निश्काशनको प्रक्रिया अगाडि बढाएको हो ।  सोको लागि बैंकले नबिल इन्भेष्टमेन्ट बैंकिङ लिमिटेडलाई धितोपत्र निश्काशन तथा बिक्री प्रबन्धक नियुक्त गरेको छ । यसअघि बैंकले जारी गरेको ९ प्रतिशत वार्षिक ब्याज भएको ३० लाख कित्ता (कुल रकम ३ अर्ब) ऋणपत्र सम्पूर्ण रुपमा आवेदन प्राप्त भई बाँडफाँड भई नेपाल स्टक एक्सचेञ्जमा सूचीकृत भइसकेको छ ।